अर्धमृत शरीर माथि
मसानघाटमा लगिसकेको लासलाई
झारफूक के के गर्दै फेरि जिवित बनाउन खोज्नेहरु
याद राख तिम्रा ती हरेक खाले दिवा सपनाहरु
मसानघाटको लास सँगै जलेर राख हुनेछन् ।
आफ्नो व्यक्तिगत स्वार्थसिद्धिको लागि
निमुखा दाजुभाई तथा दिदीबहिनीहरुको
आलो रगतलाई कौडीको भाउमा,
सडकमा रगत बगाइदिन उद्दत हे कलियुगे महिसासुरहर
तिम्रा सपनाहरु चैत मासको डढेलोमा जलेको खरघारी जस्तै
तिम्रै आँखा अगाडी डढेर खाग बन्नेछन् ।
वेलैमा तिम्रो चेत खुलेन भने यस्तो दिन आउन सक्छ
जहाँ तिम्रा कपोलकल्पित कामना संगसंगै
तिमीहरु पनि जलेर भष्म हुनेछौ ।।
बचाउ बचाउ भनेर चिच्याइरहेको
तिम्रो अर्धमृत शरीर माथि पानी होइन
डिजेल र पेट्रोलको धाराहरु खनिन सक्छ ।
त्यसैले तिमीहरुको चेत वेलैमा खुलेको राम्रो
नत्र तिमीले टेकेका हरेक जमीन
स्वत माइन बनेर पड्कने छन् ।
अनि भुस्याहा कुकुरहरुले तिम्रा उछिट्टीएका मांसपिण्ड माथि
बर्षौ देखिको भोक खुशी हुँदै मेटाउनेछन् ।।
– रमेश कुँवर
