काठमाडौं- दोलखा जिल्लाको प्राकृतिक सौन्दर्य, बालसखा तथा पारिवारिक संघर्षलाई चित्रण गरिएको ‘दोलखा सिङ्गटी’ बोलको गीत सार्वजनिक भएको छ। गीत दोलखा फिल्मस् युट्युब च्यानलमार्फत सार्वजनिक गरिएको हो।
गीतमा गायक अमृत भारतीको शब्द, अभिनेता दिनेश केसीको स्वर तथा रामकुमार नेपालीको संगीत र संगीत संयोजन रहेको छ। ‘नलेउ छट्पटी, घुम्नलाई लैजान्छु दोलखा सिङ्गटी’ बोलले दोलखाको स्थानीय परिवेश, प्रेम र आत्मीय सम्बन्धलाई प्रस्तुत गरेको छ।
अभिनेता दिनेश केसी पछिल्लो समय अभिनयसँगै गायन क्षेत्रमा पनि सक्रिय देखिन थालेका छन्। यसअघि उनले दोलखा जिल्लाका महत्वपूर्ण स्थानहरू समेटेर जिल्लाको परिचयात्मक गीत सार्वजनिक गरेका थिए।
केसीले नेपालभित्र रहेका अधिकांश देवस्थलहरूको वर्णन समेटिएको सन्देशमूलक तथा महत्वपूर्ण गीत पनि दर्शक–श्रोतामाझ ल्याउने तयारी गरिरहेको बताएका छन्।
सार्वजनिक गीतको भिडियोमा जनकबहादुर खत्री, मिनकुमारी खत्री र दिनेश केसीको अभिनय रहेको छ। भिडियोको निर्देशन लिगेश भट्टराईले गरेका हुन्।
