काठमाडौं - नेपाली कांग्रेसको १५औँ महाधिवेशनअन्तर्गत काठमाडौं निर्वाचन क्षेत्र नं. ३ को क्षेत्रीय अधिवेशन भोलि हुँदैछ। क्षेत्रीय नेतृत्व चयनका लागि विभिन्न आकांक्षीबीच सहमति जुट्न नसकेपछि आजका लागि तय गरिएको प्रक्रिया स्थगित गर्दै निर्वाचन कार्यक्रम भोलि दिउँसो १ बजे जोरपाटीस्थित पीस ब्याङ्क्वेटमा सञ्चालन हुने भएको छ।
क्षेत्रीय नेतृत्व चयनका लागि हुने निर्वाचनमा प्रतिनिधिहरूको मत निर्णायक हुनेछ। लोकतान्त्रिक विधि र प्रतिस्पर्धात्मक अभ्यासलाई आत्मसात् गर्दै नेतृत्व चयन हुने भएकाले काठमाडौं–३ को अधिवेशनलाई संगठनात्मक दृष्टिले महत्वपूर्ण रूपमा हेरिएको छ।
क्षेत्रीय सभापति पदका उम्मेदवार सन्तोष सुबेदीले नेपाली कांग्रेसको लोकतान्त्रिक चरित्रअनुसार नेतृत्व चयन पनि प्रतिनिधिहरूको स्वतन्त्र मत र विवेकपूर्ण निर्णयबाट हुनुपर्ने बताएका छन्।
सुबेदीले क्षेत्रीय सभापति पदमा आफ्नो उम्मेदवारी प्रस्तुत गर्दै अनुभव, युवा ऊर्जा र नयाँ सोचलाई संगठन निर्माणसँग जोड्ने प्रतिबद्धता व्यक्त गरेका छन्।
शिक्षा, समाजदेखि चलचित्र र संस्कृतिसम्मको अनुभव
समाजशास्त्र तथा मानवशास्त्रमा स्नातक सुबेदी लामो समयदेखि शिक्षा तथा सामाजिक क्षेत्रमा सक्रिय रहँदै आएका छन्। शिक्षा र सामाजिक चेतनाको क्षेत्रमा काम गर्दै आएको Campaign for Educational Awareness Nepal (CEAN) को नेतृत्वसमेत गर्दै आएका उनले शिक्षा, सामाजिक जागरण र समुदायसँग सम्बन्धित विभिन्न क्षेत्रमा काम गरेको बताइएको छ।
त्यसैगरी चलचित्र तथा संस्कृति क्षेत्रमा निर्माता तथा फिल्म फेस्टिभल निर्देशकका रूपमा समेत सक्रिय सुबेदीले नेपाल कल्चर एन्ड फिल्म सेन्टर (NCFC) को नेतृत्व गर्दै आएका छन्। उनको नेतृत्वमा नेपाल कल्चरल इन्टरनेसनल फिल्म फेस्टिभल (NCIFF) राष्ट्रिय तथा अन्तर्राष्ट्रिय सहभागितासहित आयोजना हुँदै आएको छ।
शिक्षा, सामाजिक सेवा, चलचित्र, संस्कृति तथा पर्यटन क्षेत्रमा हासिल गरेको अनुभवलाई राजनीतिक संगठनसँग जोडेर क्षेत्रीय कांग्रेसलाई थप समावेशी, पारदर्शी, गतिशील र जनमुखी बनाउने आफ्नो लक्ष्य रहेको सुबेदीले बताएका छन्।
युवा र महिलाको सहभागितामा जोड
कांग्रेसले १६५ निर्वाचन क्षेत्रमा युवा तथा महिलाको अधिकतम र उच्चतम सहभागितालाई प्राथमिकता दिने नीति अघि सारेको उल्लेख गर्दै सुबेदीले नयाँ पुस्ताको सक्रिय सहभागितालाई संगठनको नेतृत्वसँग जोड्नुपर्ने आवश्यकता औँल्याएका छन्।
उनका अनुसार बदलिँदो राजनीतिक तथा सामाजिक परिवेशसँगै संगठनलाई पनि नयाँ पुस्ताको ऊर्जा, प्रविधि, सिर्जनशीलता र सामाजिक अनुभवसँग जोडेर अघि बढाउन आवश्यक छ।
“अनुभवलाई सम्मान गर्दै नयाँ पुस्ताको ऊर्जा र नयाँ सोचलाई संगठन निर्माणमा उपयोग गर्न सकियो भने पार्टीको संगठन अझ प्रभावकारी बन्न सक्छ,” सुबेदीको धारणा छ।
प्रतिनिधिलाई मतदानमा सहभागी हुन अपिल
क्षेत्रीय सभापति पदका उम्मेदवार सुबेदीले काठमाडौं क्षेत्र नं. ३ का सम्पूर्ण क्षेत्रीय प्रतिनिधिहरूलाई भोलि हुने निर्वाचनमा सहभागी भई आफ्नो अमूल्य मतमार्फत नेतृत्व चयन प्रक्रियामा भूमिका निर्वाह गर्न अपिल गरेका छन्।
उनले आफ्नो उम्मेदवारी कुनै व्यक्ति वा समूहविरुद्ध नभई अनुभव, युवा ऊर्जा र नयाँ सोचलाई संगठन निर्माणमा जोड्ने उद्देश्यले अघि सारिएको बताएका छन्।
उनको भनाइ छ—
“नेपाली कांग्रेस लोकतन्त्रको पहरेदार पार्टी हो। नेतृत्व चयन पनि लोकतान्त्रिक विधि र प्रतिनिधिहरूको विवेकपूर्ण निर्णयबाट हुनुपर्छ। मेरो उम्मेदवारी कुनै व्यक्ति वा समूहविरुद्ध होइन; अनुभव, युवा ऊर्जा र नयाँ सोचलाई संगठन निर्माणमा जोड्ने उद्देश्यका साथ हो। त्यसैले मेरो काम, अनुभव, दृष्टिकोण र प्रतिबद्धताको मूल्यांकन गरी मलाई आफ्नो अमूल्य मत प्रदान गर्नुहुन सम्पूर्ण प्रतिनिधिज्यूहरूमा हार्दिक अपिल गर्दछु।”
काठमाडौं–३ को क्षेत्रीय अधिवेशनबाट आगामी कार्यकालका लागि क्षेत्रीय नेतृत्व चयन हुनेछ। अधिवेशनले क्षेत्रीय संगठनको आगामी दिशा, नेतृत्वको प्राथमिकता र कार्यशैली निर्धारणमा समेत प्रभाव पार्ने अपेक्षा गरिएको छ।
अधिवेशनको पूर्वसन्ध्यामा उम्मेदवारहरूबीचको सक्रियता बढेसँगै काठमाडौं–३ को क्षेत्रीय नेतृत्व चयनप्रति प्रतिनिधि तथा कांग्रेस कार्यकर्ताको चासोसमेत बढेको छ।
