काठमाडौं, जेठ १२ । मुलुकमा कोरोना भाइरस संक्रमण भेटिएको चार महिनाको निको हुनेको संख्या ८७ पुगेको छ। हालसम्म ६ सय जना संक्रमितमध्ये निको हुने १४ प्रतिशत छन्। गत माघ ९ गते मुलुकमा कोरोना भाइरस संक्रमित पहिलो व्यक्ति फेला परेका थिए।
स्वास्थ्य तथा जनसंख्या मन्त्रालयका प्रवक्ता डा विकास देवकोटाका अनुसार, संक्रमितको संख्या ६ सय नाघेको छ। आइतबार १९ जना नयाँ संक्रमित देखा परेसँगै संक्रमितको संख्या ६ सय तीन पुगेको हो। संक्रमित हुनेमा पाँच सय २४ जना पुरुष र ७९ जना महिला छन्। स्वास्थ्य मन्त्रालयका पूर्वप्रमुख विशेषज्ञ डा। सुशीलनाथ प्याकुरेल सरकारले पीसीआरको परीक्षणको दायरा बिस्तार गर्न ढिलो गरेको बताउँछन्।
पछिल्ला चौबिस घण्टाको अवधिमा पीसीआर विधिबाट गरिएको परीक्षण संख्या दुई हजार आठ सय ५६ छ। आरडीटी विधिबाट गरिएको परीक्षणको संख्या तीन हजार सात सय ९१ रहेको मन्त्रालयले जनाएको आजको अन्नपूर्ण पोष्ट् दैनिकमा खवर छ ।
