काठमाण्डौ  - नेपाली गीत संगीत क्षेत्रमा यस साता का उत्कृष्ट १०० मा परेका गीतहरुको यस प्रकार रहेका छन् । मिति २०७७ मंसीर ८ (२३ नोभेम्वर) गते देखी मंसीर १४ (२९ नोभेम्वर) सम्मको तालिका ।

काठमाण्डौ  - नेपाली गीत संगीत क्षेत्रमा यस साता का उत्कृष्ट १०० मा परेका गीतहरुको यस प्रकार रहेका छन् । मिति २०७७ मंसीर ८ (२३ नोभेम्वर) गते देखी मंसीर १४ (२९ नोभेम्वर) सम्मको तालिका ।

अमेरिका – सानो उमेरमै सबैको मन जित्न सफल प्रसिद्ध गायक प्रितम आचार्यको स्वर ,लोकप्रिय संगीतकार तथा गायक शशि बिक्रम थापाको संगीत ,गीतकार प्रभाकर देव शर्माको शब्दमा रहेको “म पागल सरि” गितको म्युजिक भिडियो अमेरिकामा एक कार्यक्रम बीच लोकार्पण तथा सार्वजनिक कार्यक्रम सम्पन्न भएको छ ।
मुकेश अधिकारी, गोमा बास्कोटा, निश्चल अधिकारी, लिसा बास्तोलाको अभिनय रहेको उक्त भिडियोको निर्देशन चलचित्र निर्देशक रुपेश उप्रेतीले गरेका थिए् भने म्युजिक भिडियोको छायांकन र सम्पादन योगेन थापाले गरेका हुन् । म्युजिक भिडियोको छायांकन र विमोचन कार्यक्रम लगायतको ब्यबस्थापन तुला अधिकारीले हुन् भने एल डि बास्तोलाले भिडियोको निर्माण गरेका हुन् ।

ईन्टरनेशनल फ्रेन्डस् एण्ड वार रेष्टुरेन्ट, फायरफिल्ड ओहायो, अमेरिकामा एक कार्यक्रम बीच भिडियोको लोकार्पण  ईन्टरनेशनल वेलफेयर एण्ड सर्पोट फाउन्डेशन अफ अमेरिका का सभापाति डिल्ली अधिकारीको प्रमुख आथित्यतामा सम्पन्न भएको थियो भने उक्त भिडियोका निर्माता समेत रहेका एल डि बास्तोलाले कार्यक्रमको सभापतित्व गरेका थिए ।

कार्यक्रममा म्युजिक भिडियोका निर्देशक रुपेश उप्रेती र आयुष रिजालले म्यूजिक भिडियोको वारेमा आफ्नो मन्तव्य राखेका थिए । भिडियोमा ब्यबस्थापनको भूमिका समेत निर्वाह गरेका तुला अधिकारीले कार्यक्रम संचालन गरेका थिए । कार्यक्रममा गायक प्रितम आचार्य, संगीतकार शशि बिक्रम थापा, गीतकार प्रभाकर देव शर्माले भिडियो मार्फत गीतका वारेमा आफ्ना सन्देश दिंदै निर्माण टिमलाई कार्यक्रमको सफलताको शुभकामना सन्देश समेत प्रवाह गरेका थिए ।

कार्यक्रममा प्रमुख अतिथि अधिकारीले बिदेशमा रहेर पनि नेपाली गीत संगीतलाई माया गर्ने सवैलाई धन्यवाद प्रकट गर्दै नेपाली कलाकारिता क्षेत्र एवं गीत संगीत क्षेत्रलाई आफुले सक्ने र आफुवाट हुन सक्ने सहयोग पुर्याउने संधै प्रतिबद्धता रहेको वताएका थिए ।  म्युजिक भिडियो हाम्रो आफ्नै टिभी युटुब च्यानल मार्फत सार्बजनिक भएको छ।

https://www.youtube.com/watch?v=_0Ktgoa25EU

चितवन —  कार्तिक २८, २०७७। 

पछिल्लो समय चर्चित 'मिस्टर एण्ड मिस टिकटक' प्रतियोगिताको उत्कृष्ट १२ प्रतियोगीहरु छनौट भएका छन् । कंडेल कन्सल्टेन्सीको प्रस्तुतीमा द जीएमआईको आयोजना तथा सही हो ईभेन्ट्सको सहकार्यमा संचालित उक्त प्रतियोगितामा उत्कृष्ट २० मा प्रतिस्पर्धा गरिरहेकाहरुमध्ये बाट निर्णायकहरुको मत पश्चात उत्कृष्ट १० प्रतियोगीहरु र २ जना वाईल्ड कार्डमार्फत छनौट गरिएको हो । 

प्रतियोगिताको निर्णायकको रुपमा चर्चित हांस्य कलाकार तथा निर्देशक किरण केसी, नायिका प्रियंका कार्की र नृत्य निर्देशक कविराज गहतराज रहेका छन।  

उत्कृष्ट १२ मा काभ्रेबाट सम्मान मल्ल श्रेष्ठ, चितवनबाट शोना घिमिरे, काठमाडौंबाट काजोल नेपाल, अष्ट्रेलियाबाट  पूनम तिरुवा, काठमाडौंबाट जनम परियार, अष्ट्रेलियाबाट सृजना घिमिरे, चितवनबाट अर्बिना ढकाल, रुपन्देहीबाट आरोही अधिकारी, चितवनबाट मनोज बिक र गैंडाकोटबाट रोहित पाण्डे रहेका छन्।  त्यसैगरी वाईल्ड कार्डमार्फत छनौट हुनेमा चितवनबाट बिकिता कंडेल र ईटहरीबाट प्रेतिका अधिकारी रहेका छन् ।

अब भने बिजेताको लागि उत्कृष्ट १२मा पर्न सफल रहेका प्रतिस्पर्धीहरुमाझ ग्लोबल अनलाईन पे डट कम (globalonlinepay.com) गएर वा ग्लोबल अनलाईन पेको एप मार्फत संचालित हुने भोटिङ मार्फत आफूलाई मनपर्ने प्रतियोगीलाई भोट गर्न सकिनेछ । नेपाल/बिदेशबाट प्रतियोगीलाई एक पटकमा न्यूनतम पाँच भोट देखि अधिकतम पाँच हजार भोटसम्म गर्न सकिने बताइएको छ ।

नेपाल बाहिरबाट भने भोट गर्नका लागि भिजा कार्ड र मास्टरकार्डका प्रयोगकर्ताहरुले आफ्नो संबन्धित बैंक मार्फत अनलाईन पेमेन्ट ट्रान्ज्याकसनको निमित्त आईपिजि / थ्रीडियस (IPG/3DS) सर्भिस एक्टिभेट गर्नुपर्नेछ। 

विजेताका लागि शुरु भएको अन्तिम भोटिङ प्रतिस्पर्धा मंसिर २५ गते शुक्रबार राती १२ बजेसम्म संचालित हुनेछ । 'मिस्टर एण्ड मिस टिकटक,नेपाल' को उपाधीको लागि अब उत्कृष्ट १२ प्रतियोगीले प्रतिस्पर्धा गर्ने छन् । जसको लागि ५० प्रतिशत मत अनलाईन भोटिङ मार्फत र ५० प्रतिशत मत निर्णायकमार्फत प्रदान गरिने छ। 

समाजिक संजालमा पछिल्लो समय अत्याधिक रुचाईएको टिकटकबाट नयाँ प्रतिभावान युवाहरु कलाकारिता्मा प्रवेश पाउन सजिलो भएको हामी कहाँ प्रशस्त उदाहरणहरु छन। त्यसैको सेरोफेरोमा रहेर द जिएमआइ एकेडेमीको आयोजनामा मिस्टर एन्ड मिस टिकट्क प्रतियोगिता आयोजना गरिएको द जिएमआइ एकेडेमी्का सिईओ महेश लामिछानेले जनाएका छन ।

एजेन्सी-बलिउड अभिनेता सुशान्त सिंह राजपूतको संदिग्ध मृत्युको अनुसन्धान चलिरहेका बेला अर्का एक अभिनेता अक्षत उत्कर्षको मृत्युको खबर आएको छ ।

मुम्बई प्रहरीले रिपोर्ट दर्ता गरेर यसबारे अनुसन्धान सुरु गरेको छ । प्रारम्भिक अनुसन्धानमा अक्षतको मृत्युको कारण आत्महत्या बताइएको छ । यद्यपि, परिवारले हत्याको आशंका गरेका छन् ।

२६ वर्षका टिभी अभिनेता अक्षतको मृत शरीर आइतबार राती मुम्बईको अंधेरी इलाकास्थित उनको अपार्टमेन्टमा भेटिएको थियो । अम्बोली प्रहरीका अनुसार अक्षत काम नभएका कारण डिप्रेशनका शिकार थिए जसका कारण उनले आत्महत्याको बाटो चुने । यद्यपि, अक्षतका परिवारले डिप्रेशनको कुरा अस्विकार गर्दै अभिनेतको हत्या भएको दाबी गरे ।

प्रहरीलाई उद्धृत गर्दै एएनआईले ट्वीटमा अक्षतले अंधेरी इलाकामा रहेको आफ्नो निवासमा आत्महत्या गरेको जानकारी दिएको छ । मुद्दा दर्ता गरिएको छ र यसबारे अनुसन्धान भइरहेको छ । पोस्टमार्टमपछि शव परिवारलाई सुम्पिइएको छ ।

प्रहरी अधिकारीका अनुसार अक्षत आफ्नी एक महिना साथीसँग अंधेरी आरटीओ नजिकै एक टोलमा बस्दथे । अक्षतकी साथीका अनुसार आइतबार बेलुकासम्म उनको व्यवहार सामान्य थियो । उनीहरुबीच सामान्य कुराकानी नै भयो र सुत्नु अघि सँगै खाना पनि खाए ।

हिन्दुस्तान टाइम्सको रिपोर्टमा अम्बोली प्रहरी स्टेशनका सिनियर इन्सपेक्टर सोमेश्वर कांथेलाई उद्धृत गर्दै एक्सिडेन्टल मृत्युको रिपोर्ट दर्ता गरेर घटनाको अनुसन्धान सुरु गरिएको छ । प्रारम्भिक अनुसन्धान र पोस्टमार्टम रिपोर्टमा कुनै प्रकारको षड्यन्त्रको संकेत भेटिएको छैन । घटना आइतबार राती १० देखि साढे ११ बीचको हो । साथीसँगको सोधपुछमा उनी लकडाउनका कारण काम नभएका कारण तनावमा भएको र उनले साथी र परिवारसँग उधारो मागेर दैनिकी गुजारिरहेको जानकारी प्राप्त भएको भारतीय सञ्चार माध्यमले बताएका छन् । 

यद्यपि, परिवारले यसमा प्रहरीको लापरवाहीको आरोप लगाउँदै हत्याको आशंका जाहिर गरे ।

एजेन्सी- सुशान्त सिंह राजपूतको मृत्युसँग जोडिएको ड्रग्स मामिलाको अनुसन्धानमा नारकोटिक्स कन्ट्रोल ब्यूरो ९एनसीबी० ले अब दीपिका पादुकोण, सारा अली खान, श्रद्धा कपुर र रकुलप्रित सिंहको बैंक खाताबाट भएको कारोबारको अनुसन्धान गर्नेछ । यी नायिकासँग एनसीबीका अधिकारीले ड्रग्ससँग जोडिएको ह्वाट्सएप च्याटबारे थुप्रै घण्टा सोधपुछ गरिसकेको छ । मिडिया रिपोर्टका अनुसार अब उनीहरुले ड्रग्स खरिद गर्नका लागि केही ट्रान्ज्याक्सन गरेका छन् छैनन् भनेर जान्ने कोसिस भइरहेको छ ।

 भारतीय मिडियाका अनुसार चारै नायिकाले पछिल्लो तीन वर्षमा क्रेडिट कार्डमार्फत् गरिएको भुक्तानीको अनुसन्धान गरिएको छ । एनसीबीलाई उद्धृत गर्दै भारतीय मिडियाले दाबी गरे अनुसार ड्रग्स मामिलामा बलिउडका थुप्रै ठूला निर्माता र ७ ठूला नायकमाथि पनि सोधपुछ गरिनेछ ।

दीपिकाले ड्रग्स च्याट गरेका स्विकारेकी थिइन्ः

एनसीबीले शनिबार दीपिका पादुकोणलाई साढे पाँच घण्टा सोधपुछ गरेको थियो । स्रोतका अनुसार उनले आफ्नो म्यानेजर करिश्मा प्रकाशसँग ड्रग्सको च्याट स्विकारेकी थिइन् । यद्यपि, उनले ड्रग्स सेवन भने नगरेको बताएकी छिन् । यस्तै सारा र श्रद्धाले सोधपुछमा सुशान्तले ड्रग्स लिने गरेको बताएका थिए । यसअघि रकुलप्रित सिंहले रियासँग ड्रग्सबारे च्याट गरेको स्विकारेकी थिइन् ।

रियाको जमानत याचिकामा आज सुनुवाई

ड्रग्स मामिलामा गिरफ्तार भएकी नायिका रिया चक्रवर्ती र उनका भाइ शोविक चक्रवर्तीको जमानत याचिकामा मंगलबार बम्बे उच्च अदालतमा सुनुवाई हुनेछ । सुशान्तका हाउस म्यानेजर रहेका स्यामुअल मिरान्डा, कुक दिपेश सावन्त र लागुऔषध कारोबारी बासित परिहारको जमानतको निर्णय पनि आउनसक्छ । यी सबैको याचिका तल्लो अदालतले दुई पटक खारेज गरिसकेको छ ।

काठमाडौँ — भाद्र १६, २०७७। 

के-पप ब्यान्ड 'बीटीएस' 'बिलबोर्ड हट १००'को शीर्ष स्थानमा पुग्ने पहिलो साउथ कोरियन सांगीतिक समूह भएको छ । मंगलबार ब्यान्डको डेब्यू अंग्रेजी गीत 'डायनामाइट' चार्टको पहिलो स्थानमा पुगेको हो । यसअघि ब्यान्डकै 'अन'बोलको गीत बिलबोर्ड चार्टको चौथो स्थानमा पुगेको थियो ।

'बिलबोर्ड हट १००' मा गीतको बिक्री वितरण, रेडियो प्रसारण र अनलाइन स्ट्रिमिङका आधारमा गीतको सूची तयार पारिन्छ ।

'डायनामाइट'ले चौथौ पटक बीटीएसलाई बिलबोर्डको शीर्ष १० को सूचीमा ल्याएको हो । यो गीत युट्युब प्रिमियरमै सर्वाधिक हेरिएको भिडियो रहेको 'द इन्डियन एक्सप्रेस'मा उल्लेख गरिएको छ । गीतले अहिलेसम्म २६ करोडमाथि युट्युब भ्यूज प्राप्त गरेको छ ।

हालै न्युयोर्कमा सम्पन्न 'एमटीभी भिडियो म्युजिक अवार्ड'मा सात सदस्यसहितको यो ब्यान्डले यस गीतमा प्रस्तुति दिएको थियो । अवार्ड कार्यक्रममा बीटीएस बेस्ट-पप, बेस्ट के-पप, बेस्ट ग्रुपको विधामा मनोनित भएको थियो । यी तीनै विधामा ब्यान्डले अवार्ड पाएको थियो । 'अन'बोलको गीतबाट उनीहरुले बेस्ट कोरियोग्राफीको अवार्डसमेत प्राप्त गरे ।

(एजेन्सी/कान्तिपुर दैनिक)

न्युयोर्क — भाद्र १५, २०७७ । 

सीमित दर्शक र प्रस्तुतिबीच 'एमटिभी भिडियो म्युजिक अवार्ड' सम्पन्न भएको छ । कोरोना महामारीमा पनि शनिबार न्युयोर्कमा अवार्ड कार्यक्रम आयोजना गरिएको थियो ।

अवार्ड कार्यक्रममा विश्वचर्चित साउथ कोरियन ब्यान्ड बीटीएसले आफ्नो डेब्यू अंग्रेजी 'डायनामाइट'बोलको गीत प्रस्तुत गरेको थियो । ब्यान्डका सात सदस्यले संगीत कार्यक्रममा यसरी प्रस्तुति दिएको यो पहिलोपटक रहेको द हलिउड रिपोर्टरले उल्लेख गरेको छ ।

अवार्ड कार्यक्रममा बीटीएस बेस्ट-पप, बेस्ट के-पप, बेस्ट ग्रुपको विधामा मनोनित भएको थियो । यी तीनै विधामा ब्यान्डले अवार्ड पाए । 'अन'बोलको गीतबाट उनीहरुले बेस्ट कोरियोग्राफीको अवार्डसमेत प्राप्त गरे ।

सन् २०१० मा स्थापना भएको यो ब्यान्डले एल्बम 'लभ योरसेल्फ: टियर एण्ड म्याप अफ दि सोल'बाट विश्वभर चर्चा कमाएको थियो । कोरोना महामारीका कारण यो वर्ष 'एमटीभी भिडियो म्युजिक अवार्ड' भर्चुअलजस्तै भयो ।

न्युयोर्क सहरको खुल्ला स्थानमा कार्यक्रमको केही प्रस्तुतिहरु भए सीमित दर्शक र सामाजिक दूरी कायम गर्दै आयोजना भएको अवार्ड कार्यक्रममा माइली साइरस, लेडी गागालगायतले प्रस्तुति दिएका थिए ।'ब्लाइन्डिङ लाइट्स'बाट द विकेन्डले 'भिडियो अफ दि इयर'को अवार्ड प्राप्त गरेको छ । द विकेन्डले यसै गीतबाट 'बेस्ट आर एन्ड बी' को समेत अवार्ड हात पार्‍यो ।

त्यस्तै लेडी गागाले आर्टिस्ट अफ द यिअरको अवार्ड हात पारेकी छिन् ।

त्यस्तै गायिका अरियाना ग्रान्डे र जस्टिन बिबरले 'बेस्ट भिडियो फ्रम होम' विधामा अवार्ड पाए । लेडीगागा र अरियानाले 'रेन अन मि'बाट 'सङ अफ दि इयर'को अवार्ड पाए । यसै गीतले बेस्ट सिनेमेटोग्राफीको पनि अर्वाड पायो ।

(कान्तिपुर दैनिक)

काठमाडौँ — भाद्र १४, २०७७। 

बलिउडका ठूला कलाकारका फिल्म नेटफ्लिक्समा भटाभट आउनु सामान्यजस्तै भएको छ । नेटफ्लिक्सले हिन्दी भाषी कन्टेन्टलाई दिएको प्राथमिकता, झन् कोरोनाले सिनेमा हल ठप्प बनाएपछि धेरै निर्माताले यो प्लेटफर्म रोज्न थालेका छन् । हल खुल्ने दिन कुर्नुभन्दा डिजिटल प्लेटफर्ममा रिलिज गर्नु बाध्यताजस्तै बनेको हो । महामारीमा बाहिर निस्कन नपाएका दर्शकले नयाँ फिल्मको स्वाद चाख्न पाएका छन् । त्यसैमध्येको एक हो– रात अकेली है ।

नेटफ्लिक्सले निरन्तर सहकार्य गरिरहेको थोरै बलिउड कलाकारमा पर्छन्, नवाजुद्दिन सिद्धिकी र राधिका आप्टे । क्राइम–थ्रीलर जनराको यस फिल्ममा यी दुई मुख्य भूमिकामा छन् । निर्देशक हुन् हनी त्रेहान । फिल्म उत्तर प्रदेशको एउटा सानो सहरमा भएको हाई–प्रोफाइल हत्याकाण्डमा केन्द्रित छ । कसैको रहस्यमयी हत्या हुनु, त्यसको अनुसन्धानका लागि प्रहरी अफिसर खटिनु, घटनामा अनेकको स्वार्थ जोडिनु, छिनछिनमा नयाँ ट्वीस्टहरू आउनु, थप शंकास्पद बन्दै जानु अनि क्लाइमेक्स आम दर्शकको सोचाइभन्दा फरक हुनु, यस जनराका फिल्मको साझा विशेषता हो । ‘रात अकेली है’ योभन्दा अलग छैन, बरु यसले समाजका ती यथार्थलाई पटकथामा बुनेर रोचकता थप्ने काम गरेको छ ।

एक वृद्ध धनी व्यक्ति (रघुवीर सिंह) को बिहेकै रातमा हत्या हुन्छ । उनको पत्नी र चालकको पनि पाँच वर्ष पहिले हत्या भएको हुन्छ । तर, हत्याराको पहिचान हुन सकेको छैन । रघुवीरको हत्याको अनुसन्धान गर्ने जिम्मेवारी पाउँछन्, इन्स्पेक्टर जटिल यादव (नवाजुद्दिन) । जटिल झोक्की, निडर छन् र व्यावसायिक पनि । घरमा आफन्त मात्र भएका बेला कसरी गोली हानेर हत्या सम्भव भयो ? जटिलका लागि यो केस निकै जटिल बनिदिन्छ । तैपनि मिहिन ढंगले अनुसन्धान सुरु गर्छन् तर एकपछि अर्को दबाब आउन थाल्छ । रघुवीरको नवदुलही राधा (राधिका आप्टे), उनका भजिताहरूदेखि परिवारका हरेक सदस्य हत्यामा संलग्न भएको शंका पैदा हुन्छ । आफ्नै अफिसबाट साथ नपाइरहेका बेला जटिलले यो हत्या प्रकरणको वास्तविकता पहिल्याउन सक्छन् ? पाँच वर्षअगाडिको हत्याकाण्डसँग यो घटनाको सम्बन्ध छ ? हत्या नै गर्नुपर्ने गरी रघुवीर कसको र किन आँखाको कसिंगर बनेका थिए ? यी सवालहरूको जवाफ खोजिएको छ ।

सरसर्ती हेर्दा कथामा नयाँपन छैन, तर पात्र, पात्रबीचको द्वन्द्व र त्यसबाट निम्तिने घटनाक्रमले फिल्मलाई कसिलो बनाएको छ । पात्र धेरै छन् र हरेकको विशिष्ट भूमिका छ, निर्देशक त्रेहान र लेखक स्मिता सिंहको पात्रमाथिको नियन्त्रण साँच्चै गज्जब छ । उमेर घर्किसक्दा पनि बिहे नभएकाले इन्स्पेक्टर जटिलले दैनिक आमाको किचकिच सुन्नुपर्छ, दौंतरीहरू बच्चाको बाबु बनिसकेका छन् तर उनी अझ बिहे गर्न तयार छैनन् । जसोतसो अफिसकै काममा तल्लीन हुन खोज्छन् । दक्ष अधिकृतको छवि बनेको छ र रघुवीरको हत्या अनुसन्धानमा लागेपछि उनको जीवनमा संकट थपिएको छ । खासगरी उक्त परिवारभित्रको माहोलले उनमा अनेक आशंका पैदा पर्छ । आफ्नो हजुरबुबा उमेरको पुरुषसँग बिहे गर्न अभिशप्त राधाको जीवन भोगाई चिच्याटलाग्दो छ तर उनीप्रति सहानुभूति पैदा हुन्न, घरका सदस्यले समेत छिछिः दुरदुर गर्छन् । परिआएको खण्डमा जे गर्न पनि पछि नहट्ने बानी छ उनको ।

कुलतमा फसेको रघुवीरका छोरा, शक्ति र सम्पत्तिको घमण्ड भएको रघुवीरका ज्वाइँ, बाबुको हत्याले पिरोलिएकी छोरी करुणा (श्वेता त्रिपाठी), काकाको सम्पत्ति हत्याउन अग्रसर भजितो विक्रम (निशान्त दहिया), परिवारको इज्जतको खुब चिन्ता लिने विक्रमकी आमा प्रमिला सिंह (पद्मावती राव), घरेलु कामदार चुन्नी, स्वतन्त्र विधायक मुन्ना राजा

(आदित्य श्रीवास्तव) अनि उनको चाकरीमा लिप्त एसएसपी लालजी शुक्ला (तिमांसु धुलिया) लगायत पात्रको बिस्कुन छ । तर हरेकलाई दर्शकले नियालिरहन्छन् । अर्को सुखद पक्षचाहिँ पहिलो दृश्यमै निर्देशकले पात्रको प्रवृत्ति झल्काएका छन्, त्यसैले सुरुवातबाटै पात्रलाई आत्मसात् गर्न सकिन्छ । मुन्ना राजाबाहेक फिल्म घरभित्रै पात्रमा सीमित छ तर पनि त्यहाँभित्रको रस्साकसी र इन्स्पेक्टर जटिलले पत्ता लगाउने नवीन तथ्यले फिल्म हेरिरहँदा झिँजो लाग्दैन ।

निर्देशक मूलतः कथावाचक हो । फिल्म बनाउनुका पछाडि निर्देशकको आफ्नो उद्देश्य हुन्छ । ‘रात अकेली है’ मा लुकेको त्रेहानको स्वार्थ भनेको प्रतिष्ठा कमाएको परिवार र व्यक्तिभित्रको ढोंग, घरेलु यौनहिंसा, धनको लालसा अनि राजनीति–अपराधको नेक्ससलाई उदाङ्गो पार्नु देखिन्छ । तर, यी पाटालाई उनले खुलमखुला भनेका छैनन्, बरु पात्रमार्फत अप्रत्यक्ष शैलीमा दर्शकलाई अनुभूत गराउँछन् । सम्पत्तिकै कारण तमाम घृणित व्यवहार भए पनि रघुवीरसँग नेतादेखि आफन्तसम्म नजिक छन्, उनको आनीबानीमाथि प्रश्न उठाउने ल्याकत राख्दैनन् । विधायक मुन्ना राजा त रघुवीरका भतिजासँग आफ्नो छोरी विवाह गरिदिनसमेत तयार छन् । परिवारभित्रको आपसी जालझेलमा खेलेर उनी आफ्नो स्वार्थसिद्ध गर्छन्, जबकि उनी त्यस क्षेत्रका लोकप्रिय र सम्मानित नेता हुन् ।

सुरुवाततिर उतिबिघ्न ख्याल नगरिने पात्र प्रमिलामार्फत इज्जत जोगाउने र सम्पत्ति हत्याउने लहडमा सामान्य व्यक्ति कसरी अपराध कर्ममा मोडिन्छ भन्ने झल्को पाइन्छ । अनि, सम्भ्रान्त वर्गको आपसी लडाइँमा दिनरात काम गरेर जीविका चलाउने चुन्नीको दुःखद अन्त्यले भावुक बनाइदिन्छ ।

इन्स्पेक्टर जटिल र पति गुमाएकी राधाबीचको सम्बन्धले पनि फिल्मको वजन बढाएको छ । यी दुईबीचको आकर्षण र घृणाको सम्बन्धलाई निर्देशकले चलाखीपूर्वक बुनेका छन्, केही नभनेझैं गरेर धेरै कुरा भनिएको छ । तर, जटिलसँग ठोक्किन आउने कतिपय पात्र र घटनाक्रमले फिल्मको बहाव बिथोल्न भूमिका खेलेको छ । उनीभन्दा कनिष्ट अधिकृत र एसएसपी शुक्लासँगको नोकझोंकलाई अनावश्यक स्थान दिइएको छ । कतिपय ठाउँमा उस्तै प्रकृतिका दृश्य दोहोरिन्छन् । त्यसो त प्रहरी प्रशासनभित्र कर्तव्यनिष्ट प्रहरीलाई टिक्न कति मुस्किल छ भन्ने तीतो यथार्थ प्रस्ट्याउने निर्देशकको अभीष्ट हुन सक्छ । त्यस्तै, राधाको तनावग्रस्त पृष्ठभूमि र घरेलु कामदार चुन्नीकी हजुरआमाको हविगत त्यतिकै मार्मिक छ । रघुवीर र प्रमिलाकी छोरीबीचको दृश्यले साँच्चै मुटु कमाउँछ ।

प्रहरी अधिकृतको भूमिकामा नवाजुद्दीनलाई यसअघि पनि नदेखिएको होइन् तर पनि उनले नयाँ गुण/ व्यवहार/ मनोविज्ञानमार्फत चरित्रमा ताजापनको आभास गराएका छन् । तुलनात्मक रूपमा राधिका आप्टेको भूमिका चुनौतीपूर्ण छ । बाबुबाट बेचिएकी उनी जीवन धान्न वा गरिबीको दलदलबाट बाहिर निस्कन आफ्नो शरीर बेच्न बाध्य छिन् । सबैले चिथोरेर हुनुपर्छ, मायाप्रेमप्रति उनको अनुराग हटिसकेको छ । बलिउडमा हिरोइनको स्थापित मान्यतालाई भत्काउने राधिकाको अभियानमा यो भूमिका अर्थपूर्ण छ ।

पितावियोग, पिताप्रतिको वितृष्णा र अन्य आफन्तको झेलमा पिल्सिरहेकी चरित्रमा श्वेता त्रिपाठी सशक्त लाग्छिन् । तिंमासु धुलिया, पद्मावती राव, निशान्त दहिया, आदित्य श्रीवास्तव लगायतका कलाकारको अभिनय प्रशंसनीय छ । उत्तर प्रदेशको रियल लोकसनले कथालाई विश्वसनीय बनाउन भूमिका खेलेको छ ।

केही कमजोरीका बाबजुद क्राइम थ्रिलर फिल्ममा हुनुपर्ने गुणलाई आत्मसात् गरेकाले निर्देशक त्रेहान तारिफका हकदार हुन् । अब के होला भन्ने कौतूहलताले अन्त्यसम्मै पछ्याइरहन्छ । हामीले बाँचिरहेको समाजभित्र लुकेका फोहोरी प्रवृत्तिबारे पनि जानकार गराउँछ ।

(कान्तिपुर दैनिक)

काठमाडौँ — भाद्र १२, २०७७। 

बलिउड नायक सुशान्त सिंह राजपुतको निधनपछि उनकी प्रेमिका रिया चक्रवर्तीको बिषयममा थुप्रै खालका खबर सार्वजनिक भैरहेका छन् । केही मिडियामा त रिया र निर्देशक महेश भट्टविच प्रेम रहेको चर्चा पनि नचलेको होइन ।
रियाले जुन ८ मा महेशलाई म्यासेज गरेकी थिइन् । सुशान्तको निधनपछि यो म्यासेज सार्वजनिक भयो ।

यो बिषयमा कुरा गर्दै रियाले एक टेलिभिजनमा भनेकी छिन्–‘के म कसैसँग सल्लाहा लिन सक्दिनँ ? म एक्लो भएको थिएँ । मैले अपार्टमेन्ट छाड्दै गर्दा सुशान्तले मलाई एकपटक पनि रोक्ने प्रयास गरेनन् । यसैले म उनीसँग निराश भएकी थिएँ । उनले मलाई फेरि फोन पनि गरेनन् । उनले मलाई आफ्नो जिन्दगीबाट अलग बनाइसकेका थिए । 

सुशान्त विरामी भएकै कारण उनले मलाई अपार्टमेन्ट छाड्दा केही नभनेको देख्दा म दुःखी थिएँ । यसैले मैले महेश भट्टलाई मेसेज गरेँ । भट्टले मलाई तिमीले तिम्रो बुबाको बारेमा सोच भन्ने सल्लाहा दिएका थिए । मलाई महेश भट्टले बच्चा भनेर बोलाउँछन् । मेरो उमेरको उनकी छोरी छन् । मानिसहरुले हाम्रो पवित्र सम्बन्धलाई गलत अर्थ लगाएका छन् ।’

रियाले सुशान्तको अपार्टमेन्ट छाड्नुअघि सम्पूर्ण डाटा डिलेट गरेको चर्चा समेत चलेको थियो । तर, यसलाई रियाले अनावश्यक हल्ला भनेकी छिन् । उनले, सुशान्तको जिन्दगीलाई कन्ट्रोल गर्नका लागि आफूले कुनै पनि काम नगरेको पनि स्पष्ट पारेकी छिन् ।

(एजेन्सी/अनलाईन खबर)